काठमाडौँ :- पछिल्ला तीन कारोबार दिनदेखि निरन्तर बढ्दै आएको नेप्से परिसूचक आज घटेर बन्द भएको छ। सोमबार नेप्से परिसूचक १०.५३ अंकले घट्दै २६२२.८८ विन्दुमा झरेको हो।
नेप्सेसँगै आज शेयर बजारको कारोबार रकम पनि घटेको छ। आइतबार ५ अर्ब ५३ करोड रुपैयाँको कारोबार भएको बजारमा आज ३३७ कम्पनीका ६९ हजार ५४८ पटकको कारोबारमार्फत ४ अर्ब ७७ करोड ४७ लाख ८६ हजार रुपैयाँ बराबरका १ करोड ३७ हजार कित्ता शेयर किनबेच भएका छन्।
आज एसवाई प्यानल नेपालको शेयरमूल्य सबैभन्दा धेरै १० प्रतिशतले बढेको छ। त्यसैगरी, ग्लोबल आइएमई समुन्नत योजना–२ को इकाईमूल्य करिब १० प्रतिशतले बढ्दा कर्पोरेट डेभलपमेन्ट बैंक र सप्तकोशी डेभलपमेन्ट बैंकको शेयरमूल्य साढे ६ प्रतिशतभन्दा बढीले वृद्धि भएको छ। यता, विन नेपाल लघुवित्त वित्तीय संस्थाको शेयरमूल्य आज सबैभन्दा धेरै १० प्रतिशतले घटेको छ।
कारोबार रकमका आधारमा आज एसवाई प्यानल नेपाल शीर्ष स्थानमा रह्यो। सो कम्पनीको २३ करोड २ लाख रुपैयाँ बराबरको शेयर कारोबार भएको छ। मञ्जुश्री फाइनान्सको करिब १८ करोड रुपैयाँको शेयर कारोबार हुँदा शिवम् सिमेन्ट्सको साढे १३ करोड रुपैयाँभन्दा बढीको शेयर किनबेच भएको छ।
आज कारोबारमा आएका १३ उपसमूहमध्ये २ उपसमूहको परिसूचक बढ्दा ११ उपसमूहको परिसूचक घटेको छ। विकास बैंक र म्युचुअल फण्ड उपसमूहको परिसूचक भने सामान्य बढेको छ।
तपाईको प्रतिक्रिया
